هيدر


نصائح مهمة لطلاب الصف الثالث الثانوي لاداء الامتحانات بشكل صحيح 


  • لازم ليلة الإمتحان و بأي طريقة تنام ٦ ساعات أو ٧ ساعات .. إياك تروح الإمتحان من غير نوم دماغك هتهرب منك ومش هتركز.


  • لازم تروح يوم العربي ( اللي هو أول مادة ) بدري نص ساعة علشان تعرف مكان لجنتك .. إياك تروح علي الميعاد بالظبط لأنك بكده هتضيع علي نفسك نص ساعة من وقت الإمتحان في التعرف علي مكان لجنتك و الجلوس فيه حتي تهدأ.
  • بلاش تسمع حاجة من أصحابك سواء خير أو شر قبل الإمتحان .. يعني حرفيا .. أعزل نفسك و خليك في حالك .


  • أول حاجة تعملها جوه اللجنة تكتب بياناتك بخط واضح ( لأنك بعد ما بتخرج من اللجنة الشيطان بيستلمك و يصورلك إنك لم تكتب بياناتك و ده للأسف يؤثر علي تركيزك في المادة التالية ).


  • لازم تكون لابس ساعة في إيدك جوه اللجنة و كمان أدواتك كاملة .


  •  تعامل مع الأسئلة بكامل تركيزك و حاول تكون ثابت علي قدر الإمكان حتي لو شفت أسئلة مش عارفها .


  •  قراءة رأس السؤال .. قراءة رأس السؤال .. قراءة رأس السؤال .. مهم جداًااااااا لأنه بيعرفك المطلوب بدقة وكده تبدأ الإجابة صح.

  •  وقت الإمتحان متظبط علي عدد الأسئلة وزيادة شوية مش تقلق من الوقت خااااالص زي ما قلنا في النقطة اللي قبل كده جاوب علي الأسئلة الإجبارية أولاً وبعد ما تراجع كل إجاباتك ممكن تحل الإختيارية. 


  • لو شفت سؤال - لا قدر الله - صعب و لقيت نفسك تنحت قدامه زيادة عن اللزوم سيبه و أنقل علي سؤال تاني و ابقي أرجع له بعدين.


  • لو أثناء اللجنة لاحظت إن المراقب بيتكلم مع زميله أو زميلته في اللجنة و يشوش عليك .. أرجوك خليك جرئ وأطلب منهم و بكل أدب إنه يساعدكم بتوفير هدوء اللجنة. 


  • لو أثناء اللجنة لاحظت صوت ضوضاء شديد كتخبيط جاي من ورشة قدام المدرسة مثلا .. اطلب من المراقب يحل الموضوع ده .. هما هيتصرفوا و يبعتوا عامل يستأذن من صاحب الورشة بكل ذوق و علي فكرة بيستجيبوا .


  • خليك بارد و بلاش تخلي أي حاجة توترك .. يعني لو المراقب كل شوية يقول باقي كذا دقيقة و وقت الإمتحان يخلص خليك بارد و بلاش تتوتر .. لو حد في لجنتك اتظبط بيغش و عمل مشكلة و حصلت ضوضاء و صوت عالي خليك بارد و ركز في إجابتك و ورقتك و خليك فاكر إن مجهود سنة كاملة ممكن يضيع لو معرفتش تمسك أعصابك جوه اللجنة.


  • جوه اللجنة لازم تكون مقاتل عنيد و بلاش تستسلم و تجاوب أي كلام بغرض إنك تخلص من الإمتحان و تخرج من اللجنة و خلاص.


  • جوه اللجنة إياك إياك إياك تخرج دقيقة بدري عن الوقت المحدد .. استغل الوقت حتي أااخر ثانية جاوب و راجع مرة و اتنين و لو اتبقي وقت بعد كده جاوب علي الأسئلة الاختيارية .


  •  بعد الخروج من اللجنة ممنوع ممنوع تراجع مع حد من زمايلك .. اللي حصل حصل و الكلام في اللي فات نقصان عقل .. و علي طول تروح علي البيت و تجنب المشي في الشمس .. و إياك تفتح نت أو تراجع إجابتك منه ( و يا سيدي بعد آخر مادة في آخر يوم ابقي افتح نت و راجع مع زمايلك براحتك ).


  • طوال أيام الامتحانات حافظ جدا علي التزامك الديني لأنه  بيديك ثبات و راحة نفسية مطلوبين جدااااااً   أيام الامتحانات.. أي ذكر وإستغفار مش محتاج منك وضوء وطهارة.


بالتوفيق للجميع 

Post a Comment

أحدث أقدم